Egjipti lëshoi të hënën një urdhër që ndalonte nxënëset të mbanin mbulesë të fytyrës ose “nikab” në shkolla, duke ndezur një debat në mediat sociale, me shumë përdorues që e etiketuan ndalimin si shtypës, ndërsa të tjerë shprehën mbështetjen e tyre.
Sipas deklaratës së ministrisë së arsimit të botuar në gazetën shtetërore Akhbar al-Youm, “çdo formë e mbulimit të flokëve që bie ndesh me gjendjen e dukshme të fytyrës nuk është e pranueshme”, shkruajnë mediat e huaja, përcjell Telegrafi.
Nxënësit do të lejohen të mbajnë një hixhab ose shami nëse ata zgjedhin një gjë të tillë, por ajo duhet të jetë në ngjyrën e zgjedhur nga ministria dhe drejtoria lokale e arsimit, thuhet në deklaratë.
Kodi do të zbatohet nga fillimi i vitit akademik në 30 shtator deri në qershor 2024 dhe vendimi do të zbatohet si për shkollat publike ashtu edhe për ato private.
Dhe kritikët e kodit të ri të veshjes u shfaqën në mediat sociale duke akuzuar qeverinë për ndërhyrje në të drejtat e grave.
“Lërini gratë të veshin çfarëdo që u duket e përshtatshme. Ne duam një botë të lirë dhe të barabartë për gratë që të vendosin se çfarë të veshin pa ndërhyrë shteti në të”, shkroi një përdoruese me emrin Zainab Dabo në X, e njohur më parë si Twitter.
Ata që kundërshtuan ndalimin thanë se Niqabi është një “obligim fetar” dhe nuk duhet të politizohet.
“Nikabi nuk është problem, problemi është injoranca dhe intoleranca e atyre që duan t’ua imponojnë pikëpamjet e tyre të tjerëve. Niqabi nuk është një deklaratë politike, është një detyrim fetar,” postoi një përdorues i identifikuar si Rizwan Kayani në X. /Telegrafi/