Edmond Azemi ka një mesazh për Plisat

Tre humbjet e pësuar brenda dy-tre jave, ka bërë që të dëshpërohen tifozët prishtinas, me ç’rast ka folur kapiteni i ekipit, Azemi.

Ai ka premtuar se shumë shpejt skuadra do t’i rikthehet fitoreve dhe se klubi ka nevojë për përkrahje edhe më tepër.

Ja mesazhi i plotë i Edmond Azemit

Të nderuar Plisa, të dashur tifozë të Klubit të Basketbollit SIGAL Prishtina.
Më lejoni, që me pak fjali të ju drejtohem në mënyrën më të sinqertë nëpër momentet që jemi duke kaluar.
E dimë që jemi duke kaluar në një fazë të keqe të rezultateve sportive, si klubi më i madh i gjithë shqiptarisë.
Duke e marrë parasysh izolimin dhe etjen që kemi pasur për basketboll, ne si klub kemi vendosur të garojmë në tri garat vetëm e vetëm për të ju kënaqur juve me basketboll.
Edhe pse, ne si klubi me i varfër në FIBA Europe Cup me një buxhet shumë të ulët në krahasim me klube tjera, arritëm që të mposhtim ekipe me buxhete milionëshe.
Paraqitja jonë ishte shumë dinjitoze dhe shumë e lavdëruar nga të gjitha ekipet pjesëmarrëse. Ne po ashtu mposhtem ekipin e pamposhtur në grup CS Energia.
Fati nuk ishte me ne lojën e fundit, sepse erdhi në shprehje lodhja e madhe që kishim gjatë gjithë atyre udhëtimeve të gjata dhe sakrificave të ndryshme gjatë rrugëtimit tonë.
Më lejoni që, si kapiten i kësaj ekipe te ju paraqes shumë sinqerisht formën tonë jo të mirë në këtë periudhë. Duke garuar në tri ligat ne jemi lodhur pa masë dhe si pasojë e kësaj kanë ardhur edhe deri te lëndimet e shumë bashkëlojtarëve të mi, të cilët edhe pse të lënduar po mundohen ta japin maksimumin.
Andaj, më besoni se ne shumë shpejt do ta marrim veten. Shumë besoj, që edhe me ndihmën e kryesisë fantastike qe ka ky klub, të cilët punojnë ditë e natë për të na krijuar kushte me standarde evropiane, besoj që së bashku do të ia dalim.
Ju garantoj si kapiten i ekipit, që pjesa e dytë e sezonit do të jetë sikurse ajo e sezonit të kaluar. Nëse ju kujtohet ne ishim ata që shkruam historinë së bashku me JU!
Klubi normal që duhet dhe përkrahet në fitore, por më shumë duhet dashur dhe përkrahur në humbje, sepse atëherë kur gjithë mendojnë që ne po humbasim, ju jeni ata që do të na ngritni lartë.
Duke ju falënderuar për durimin që kishit për ta lexuar këtë shkrim, ju bëj thirrje të gjithëve për durim dhe njëkohësisht ju ftoj që edhe këtë sezon ta shkruajmë historinë së bashku.
Historia jemi ne!
Sinqerisht i juaji Edo Azemi