Merita Humolli
IFA Personal Trainer
045 27 57 57
Fitness Gym Prishtina
Në qoftë se nuk ka probleme shëndetësore të cilat mund të ndikojnë në shtatzëni, nëse gryka është e mbyllur fort dhe nuk ka kontraksione, ushtrimi gjatë shtatzënisë lejohet.
Femra mund të ushtrojë gjatë tërë shtatzënisë, mirëpo duhet t’u shmanget aktiviteteve të cilat përfshijnë kërcimet derisa shtrati të mos forcohet për mitre, transmeton Telegrafi.
Programi i ushtrimeve për shtatzëna patjetër duhet të përmbajë ushtrimet për shtimin e lëvizshmërisë së kërdhokullave, qarkullimin e mirë të gjakut në këmbë dhe duar, shtimin e kapacitetit të mushkërive, forcimin e muskujve të barkut dhe të fundit të komblikut, në mënyrë që të pengohet dhe të zvogëlohen problemet të cilat shfaqen gjatë shtatzënisë dhe pas lindjes, dhe në mënyrë që vetë lindja të bëhet sa më e suksesshme.
Nga muaji i katërt deri në përfundim të shtatzënisë nuk bën të ushtrohet në pozitën e shtrirë më gjatë se pesë minuta, sepse për shkak të presionit të mitrës në enët e mëdha të gjakut mund të shkaktohet kolapsi.
Ushtrimet u përshtaten periudhave të shtatzënisë në atë mënyrë që nuk bëhen të njëjtat ushtrime në tremujorin e dytë dhe të tretë. Sa më shumë që ofrohet lindja, theksi vihet në forcimin e muskujve të cilët përdoren në fazën e tendosjes , d.m.th. në fazën e lindjes së bebes.
Aktiviteti i aerobisë, vrapimi, vozitja e biçikletës, ushtrimi në vegla mund të çojnë në ndërprerjen e zhvillimit të frytit, sepse shpenzojnë sasi të mëdha të oksigjenit. Këto aktivitete duhet të shmangen apo të bëhen nën mbikëqyrjen e ekspertit të ushtrimit të shtatzënave.
Por rekomandimi kryesor është se gratë shtatzëna gjithmonë duhet të veprojnë në varësi me gjendjen e tyre fizike; nëse ndjejnë lodhje apo stërmundim të muskujve, këshilla është që ushtrimet të pakësohen ose të bëhen më të rralla.
Të gjitha këto këshilla janë të mira për ata që përballen me një shtatëzani normale, pa ndonjë problem, përndryshe ju do të këshilloheni me mjekun tuaj dhe le t’ju këshillojë mbi llojin e aktivitetit fizik të rekomanduar për gjendjen tuaj.
Gratë të cilat gjatë shtatzënësisë mbeten fizikisht aktive, mbajnë shëndetin e mirë të tyre dhe fëmijës me vite të tëra pas lindjes. /Telegrafi/