Këshilli Prokurorial i Kosovës (KPK), ka marrë vendim që nga dita e hënë e 5 dhjetorit të gjitha prokuroritë të vazhdojnë punën me kapacitete të plota.
Sipas njoftimit, pezullimi i bashkëpunimit për iniciativat e përbashkëta në mes të KPK-së dhe Qeverisë do të vazhdojë deri në një vendim tjetër, ndërsa KPK-ja dhe prokuroritë do të marrin pjesë në komisionet dhe grupet tjera ku pjesëmarrja përcaktohet me legjislacionin në fuqi.
Ky vendim i vjen pas Aktvendimit të Gjykatës Themelore të Prishtinës, e cila ka aprovuar propozimin për caktimin e masës së sigurisë lidhur me vendimin e Qeverisë së Republikës së Kosovës për uljen e pagave të prokurorëve.
“Edhe me këtë rast, Këshilli Prokurorial i Kosovës i bënë thirrje Qeverisë të Republikës së Kosovës që të bëjë shfuqizimin e vendimit të saj Nr.03/109, të datës 23 nëntor 2022, për zvogëlimin e pagave të prokurorëve”, thuhet në komunikatën për media.
Ndryshe, Këshilli Gjyqësor i Kosovës (KGJK), ka njoftuar se nga nesër edhe gjykatat të vazhdojnë punën me kapacitete të plota. /Telegrafi/