Një faqe interneti e grupeve radikale ka njoftuar se edhe një shqiptar ka vdekur duke luftuar si xhihadist në Siri. Sipas këtij njoftimi personi në fjalë është Fuad Mustafa, nga Maqedonia.
“Bie shehid vëllau jone Sejfullah Albani nga Hasanbegi (Fuad Mustafa)… Ishte agjërueshëm dhe nuk i pritoi punës, shkoi për tu ballafaquar me qafirët në kodrat e Latakias mirëpo nuk e dinte që ai vend do të ishte vendi i tij ku do te takohet me hyrit në xhenet me lejen e Allahut”, thuhet në këtë njoftim.
Ende nuk është provuar vërtetësia e këtij lajmi.
Në luftën sektare në Siri e Irak ku së paku dy grupe të mëdha xhihadiste po bëjnë terror në popullsinë civile atje, Shteti Islamik (ISIS) dhe Al-Nusra, janë duke luftuar qindra shqiptarë nga Kosova, Shqipëria e Maqedonia.
Besohet që vetëm nga Kosova në këtë luftë janë vrarë mbi 60 persona, derisa numri i atyre që morën pjesë në këtë luftë që nga viti 2012 ka qenë mbi 300 persona.
