Edhe Komuna e Gostivarit dhe ajo e Çairit kanë dërguar ekip të trajnuar për të ndihmuar të prekurit nga tërmeti në Turqi
Komuna e Gostivarit njofton se tetë zjarrfikës nga Njësiti Territorial Kundër Zjarreve në Gostivar, u nisën sot për në Turqi. Ata do të shkojnë t’u ndihmojnë autoriteteve turke, për të sanuar dëmet dhe për të nidhmuar banorët nga seria e tërmeteve që e kapluan Turqinë.
Ata, doli për t’i përcjellë kryetari i Komunës së Gostivarit, Arben Taravari, i cili theksoi se zjarrfikësit janë të trajnuar profesionalisht. Me këtë gjest, Gostivari, shtoi më tej Taravari, u jep dorë të prekurve nga tërmeti katastrofal në Turqi.
Ai tha se ekipi i zjarrfikësve me vete do të marrë edhe ndihma humanitare të donuara nga Kompania “Almero”.
“Një ekip i licencuar i kërkim-shpëtimit nga Komuna e Gostivarit i përbërë prej 8 personash, u nis sot për t’ju dalë në ndihmë banorëve të prekur nga tërmeti në Turqinë Juglindore, te cilët morën me vete edhe një pjesë ndihmash humanitare të donuara nga Kompania “Almero”. I falënderoj për gatishmërinë heronjtë e qytetit tim dhe ju uroj rrugë të mbarë dhe permbushje të misionit me nder dhe profesionalizëm”, deklaroi kryetari i Komunës së Gostivarit, Arben Taravari.
Ndërsa ish-kryetari i Çairit Izet Mexhiti, njoftoi se drejt Turqisë janë nisur një ekip i Shoqatës së Zjarrfikësve Vullnetar “Bajram Miftari”.
“Drejt Turqisë së goditur nga tërmeti i tmerrshëm dhe në ndihmë të popullit turk, po niset edhe një ekip i Shoqatës së Zjarrfikësve Vullnetar “Bajram Miftari” nga Çairi. Me Visar Ganiun para nisjes takuam të parin e kësaj shoqate Artan Demiri. Ky mision humanitar që po realizohet nga djelmoshat tanë, shpresojmë të jetë një ndihmë që do ti zbuste sadopak pasojat nga tërmeti. Sot lutjet me shpirt e me zemër të gjithë i kemi të drejtuara nga Turqia dhe populli turk dhe shpresojmë që dhimbje të tilla të mos përsëriten kurrë”, ka shkruar ish kryetari i komunës së Çairit, Izet Mexhiti.
Ndërsa më herët edhe tetë zjarrfikës nga Tetova janë nisur për në Turqi, për të ndihmuar të prekurit nga tërmeti./Telegrafi/