Lëkundjet e tërmetit që ka goditur Shqipërinë kanë prekur edhe qytetin e Prizrenit. Banorët thonë se frika që u kanë shkaktuar ato lëkundje ishte e paimagjinueshme. Disa nga ta në ato qaste madje kanë braktisur edhe objektet e banimit.
Lëkundjet e tërmetit që goditi Shqipërinë në orët e hershme të mëngjesit të ditës së martë u ndien edhe në qytetin e Prizrenit.
Valdet Vorfi tregon tmerrin e përjetuar kur ka parë se si objektet brenda shtëpisë së tij kanë filluar të lëkunden.
“isha duke fjetur kush shoqja me ka zgjuar nga gjumi e frikësuar. Kam parë orenditë shtëpiake teksa po lëkundeshin”, tregon për RTV Dukagjinin, Valdet Vorfaj.
E për ndjesinë e tmerrshme nga lëkundjet, njëjtë është shprehur edhe Afrim Binaj.
“Isha në gjumë dhe për një moment kam ndjerë lëkundje. Lëkundjet ishin të forta saqë të krijohej përshtypje se po të lëkund dikush. Janë lëkundur edhe orenditë shtëpiake. Pavarësisht se lëkundjet ishin çështje sekondash, por ishte një ndjenjë që zgjaste shumë”, thotë Afrim Binaj, përcjell Telegrafi.
E nga frika që u kanë shkaktuar lëkundjet, ka pasur edhe nga ata banorë që kanë dalë jashtë objekteve ku banojnë.
“Njerëzit kanë dalë jashtë shtëpive sepse ishte diçka e tmerrshme. Pasi kemi dalë jashtë kemi parë njerëz tjerë që kanë lënë ndërtesat nga frika e lëkundjeve që ishin të mëdha”, deklaroi Lirije Gashi.
Prizreni, është ndër komunat e Kosovës, më të afërta me epiqendrën e tërmetit. /RTV Dukagjini/Telegrafi/