Pas mbështetjes pa kushte për kryetarin Shpend Ahmeti dhe Lëvizjen Vetëvendosje (VV), Aleanca për Ardhmërinë e Kosovës (AAK) u shpërblye më marrjen e një drejtorie në komunën e Prishtinës.
Por, shumë shpejt pritet që pjesë e koalicionit qeverisës në këtë komunë të jetë edhe Aleanca Kosova e Re (AKR).
Telegrafi mëson se edhe partia e Pacollit pritet të shpërblehet më një drejtori, njëjtë sikurse AAK-ja.
Pavarësisht zgjerimit të koalicionit nga ana e VV-së, prapë nuk do ta ketë shumicën në asamblenë komunale.
Numrin më të madh të asamblistëve në komunën e Prishtinës, e ka Lidhja Demokratike e Kosovës (LDK), gjithsej 18 asamblistë.
Pastaj radhitet Lëvizja Vetëvendosje (VV), e cila numëron 10 asamblistë, duke vazhduar më pas më Partinë Demokratike të Kosovës (PDK), e cila i ka 8 asamblistë.
Aleanca për Ardhmërinë e Kosovës (AAK) dhe Aleanca Kosova e Re (AKR), kanë nga katër asamblistë, duke vazhduar më Partinë e Drejtësisë (PD), e cila i numëron 2 asamblistë, derisa Lëvizja për Bashkim (LB), Partia e Fortë (PF), partia turke – KDTP, Lista Srbska, e kanë vetëm nga një ulëse në asamblenë komunale. /Telegrafi/