Beyonce Knowles i ka mahnitur fansat në gjithë botën me performancën e saj dyorëshe në Festivalin Coachella të shtunën mbrëma.
Ndërsa jo vetëm fansat e zakonshëm e kanë ndjekur interpretimin e saj në festivalin e Kalifornisë, por atë e kanë përcjellë edhe yjet e njohura të muzikës.
Një prej tyre është e famshmja Adele, e cila e ka shijuar tej mase paraqitjen e divës amerikane në skenë.
Britanikja 29-vjeçare i ka publikuar disa video në rrjetet sociale, ku paraqitet duke u argëtuar dhe vallëzuar me muzikën e Beyonce.
Autorja e hitit “Hello” madje ka bërë edhe ‘twerk’ përpara televizorit, ndërsa videot e publikuara kanë marrë miliona pëlqime.
Gjatë performancës së saj në skenë, Beyonce i befasoi të gjithë duke ftuar në skenë Kelly Rowland dhe Michelle Williams, bashkanëtaret e dikurshme të grupit “Destiny’s Child”.
Ndërsa kujtojmë se ditë më parë, skenën e Coachellas e pushtoi edhe këngëtarja shqiptare me famë botërore, Rita Ora.
Për performancën e saj, 27-vjeçarja ishte veshur me kostum të zi, i cili ekspozonte pjesë të trupit të këngëtares. /Telegrafi/
