Eden Hazard ka pësuar një tjetër lëndim te Real Madridi dhe situata e tij sa shkon e përkeqësohet.
Ky është lëndimi i 18-të i belgut që kur iu bashkua klubit spanjoll nga Chelsea për një tarifë rekord prej 150 milionë eurosh në vitin 2019.
Kampionët në fuqi të La Ligas njoftuan se anësori do të jetë “nën vëzhgim” përpara se të konfirmojë periudhën e tij jashtë fushës.
Reali ka lëshuar deklaratën e mëposhtme: “Pas analizave të kryera sot tek Eden Hazard nga Shërbimet Mjekësore të Real Madridit, ai është diagnostikuar me tendinozë patelare në gjurin e majtë dhe është nën vëzhgim”.
Hazard u konsiderua si një nga lojtarët më të mirë në botë pas 110 golave dhe 92 asistimeve në 352 paraqitje për Chelsean.
Megjithatë, sulmuesi ka dështuar të përmbushë pritjet në katër vitet e fundit në Santiago Bernabeu.
Në fakt, belgu ka shënuar vetëm shtatë gola dhe 11 asistime në vetëm 73 paraqitje. Periudha e Hazard me Los Blancos është dëmtuar nga një sërë lëndimesh.
Kontrata e tij skadon në vitin 2024 dhe ai raportohet se po konsideron të ardhmen e tij pas lidhjeve me klubin e Cristiano Ronaldos, Al-Nassr. /Telegrafi/