Këngëtarja Aurela Gaçe vazhdon të jetë shumë e afërt dhe e hapur me dashamirësit e muzikës së saj.
Ajo së fundmi ka bërë një bashkëbisedim me ndjekësit në rrjete sociale përmes opsionit ‘pyetje-përgjigje’, ku ka zbuluar disa të pathëna nga karriera profesionale.
E pyetur nëse ndonjëherë ka vuajtur nga ankthi, artisja u përgjigj në detaje duke sqaruar arsyet, të gjitha vështirësitë si ato ekonomike e shpirtërore.
“Sigurisht. Kur ti je fëmija i madh i familjes, kur ti nuk ke asnjë të ardhur, kur dëshiron shumë në jetë, duhet të marrësh vendime e të bësh të pamundurën t’i realizosh. Gjatë periudhave të ndryshme, kam pasur vështirësi shpirtërore, psikologjike, monetare, të cilave duhet t’u jepja zgjidhje vetë”.
“Për shembull: Në koncertin e dytë recital, në Pallat të Kongreseve, ngela borxh 15 milionë lekë. 35 i përfundova me sponsora e bileta, pastaj merrja avionin çdo të premte në darkë shkoja në club diku në Zvicër, punoja deri të dielën, vija të hënën në mëngjes në shkollë, ktheja frangat në lekë, laja borxhet e kështu me radhë derisa ja dola ballë-ndritur. Imagjino ishte viti 2000. Unë luftoja të ndërtoja atë çfarë doja, por s’ka qenë aspak e lehtë”, tha Aurela Gaçe.
Megjithë sfidat në jetë, Aurela ka arritur të shndërrohet në një nga këngëtaret më të suksesshme në trojet shqiptare. /Telegrafi/