Besojeni ose jo, një sherr familjar mes një spiuni dhe gruas së tij thuajse vuri në rrezik operacionin për zbarkimin e aleatëve në Normandi gjatë Luftës së Dytë Botërore.
Kështu sugjerojnë dokumentet e MI5.
Juan Pujol, që mbante kodin Agjenti Garbo, kishte bindur nazistët se zbarkimi nuk do ndodhte në Normandi, por në Pas-de-Calais.
Por pasi u izolua në shtëpinë e tij në Londër që të ruante identitetin, e shoqja kërcënoi se do shkonte në ambasadën spanjolle pas një sherri në qershor të vitit 1943.
Ajo tha se do të tregonte gjithçka, nëse nuk e lejonin të vizitonte mamanë.
Familja ishte vendosur në veriperëndim të Londrës, ku Agjenti Garbo kishte një rrjet me agjentë që dërgonin informacione false tek spiunët gjermanët.
Informacionet e tij për nazistët bënë që ata të largoheshin nga vendi ku ndodhi edhe zbarkimi i aleatëve më 6 qershor 1944.
Por gruaja e tij nisi të sëmurej nga ajo që njihet si ‘malli për vendlindjen’.
Ajo thoshte se i mungonte ushqimi spanjoll dhe ishte e mërzitur pse i shoqi vinte kaq rrallë.
“Nuk dua të jetoj më me tim shoq,” i ulëriti ajo një oficeri të MI5.
“Edhe nëse më vrisni, do të shkoj në ambasadën spanjolle”.
Atëherë Agjenti Garbo e gjeti zgjidhjen.
Ai sugjeroi një plan për ta bindur të shoqen se shpërthimet e saj kishin bërë që ai të arrestohej.
Gruan e tij madje e dërguan për të vizituar të shoqin në burg, me sytë e lidhur.
Pas këtij takimi, ajo u bind se ai kishte nevojë për mbështetjen e saj në punën që bënte.
Këshilltari ligjor i MI5 i tha asaj se kishte vendosur që i shoqi të lirohej, në mënyrë që të vazhdonte punën.
“Nuk kam kohë për të shpenzuar me njerëz të lodhshëm. Nëse e dëgjoj emrin tënd sërish, do të arrestoj direkt,” i tha ai.
Ajo u kthye në shtëpi e zbutur dhe priste gjithmonë me qetësi të shoqin. /mapo.al/