Një adoleshent amerikan është goditur nga rrufeja derisa ishte duke rregulluar kopshtin, por që mrekullisht i ka shpëtuar vdekjes.
Daniel Sharkey ishte duke prerë degët e pemëve të fqinjit në Altamonte Springs të Florida, kur u godit nga rrufeja, transmeton Telegrafi.
Nga goditja e fuqishme ai u rrëzua në tokë dhe bënte lëvizje të pakontrolluara nga dhimbjet e mëdha – e banorët që ishin dëshmitarë të kësaj ngjarje i dolën menjëherë në ndihmë.
“U zgjova dhe pashë veten në tokë. Tentova të bërtasë por nuk mundesha”, tha ai për ËFTV.
Sharkey u dërgua në spitalin regjional të Orlandos ku u shtrua në repartin e kujdesit intensiv, nga ku është bërë e ditur se ka lëndime në kraharor nga elektriciteti që përshkoi trupin e tij. /Telegrafi/
