Trajneri i Bayern Munichut, Thomas Tuchel, ka thënë se Benjamin Pavard nuk ka kërkuar të largohet dhe këmbëngul se bavarezët nuk kanë marrë asnjë ofertë për mbrojtësin francez, i cili është lidhur me Interin dhe Manchester Unitedin.
Pavard ka qenë i lidhur me një largim këtë verë, ndërsa Nerazzurrët kishin provuar të nënshkruanin me të edhe janarin e kaluar si zëvendësues i mundshëm i Milan Skriniar.
Trajneri i Bayernit, Tuchel dha një përditësim rreth Pavardit gjatë një konference për shtyp të enjten, në prag të ndeshjes së parë të Bundesligës kundër Werder Bremenit.
“Ai nuk më tha se donte të largohej. Deri më tani, nuk ka asnjë ofertë. Ne po llogarisim plotësisht tek ai”, ka thënë Tuchel.
Pavard ka edhe 10 muaj të mbetur në kontratën e tij me gjigantët e Bundesligës që do të thotë se ai do të largohet si lojtar i lirë verën e ardhshme nëse nuk nënshkruan një zgjatje të kontratës. /Telegrafi/