Kryeministri i Serbisë, Aleksandar Vuçiq ka kërkuar nga Qeveria e Kosovës që ta vizitojë për disa orë Leposaviqin të mërkurën e kësaj jave.
Në kërkesën drejtuar Qeverisë së Kosovës, Vuçiq ka kërkuar leje që së bashku me të në Kosovë të vijnë edhe Ministri i Brendshëm serb, Nebojsha Stefanoviq dhe ai i Mbrojtjes, Zoran Gjorgjeviq. Këtyre të fundit më parë iu ishte ndaluar hyrja në Kosovë.
Ky është edhe kushti që ka vënë Qeveria e Kosovës për aprovimin e kësaj vizite, shkruan Express.
RTK2 raporton se Prishtina zyrtare ka kërkuar që në delegacion të mos jenë ministri i brendshëm serb, Nebojsha Stefanoviq dhe ai i mbrojtjes, Zoran Gjorgjeviq të cilëve edhe më herët iu ishte ndaluar hyrja në shtetin e Kosovës.
Institucionet kosovare kërkesën e Vuçiqit e kanë marrë javën e kaluar, derisa në disa nga rastet e fundit Qeveria e Kosovës ka refuzuar vizitat e zyrtarëve të Qeverisë serbe, duke ua ndalur atyre hyrjen në territorin e Kosovës.