Nga korriku ka filluar pilot-projekti i Komunës së Prishtinës, me të cilin gratë kanë mundësi të bëjnë analizën e PAP-testit falas.
Komuna e Prishtinës, së bashku me disa donatorë, kanë marrë këtë iniciativë, por fillimisht testit do t’i nënshtrohen vetëm dymijë gra të cilat janë nën asistencë sociale.
Drejtori i Shëndetësisë në Komunën e Prishtinës, Arben Vitia, thotë se qëllimi i këtij pilot projekti është vetëdijesimi i grave, raporton KTV.
Vitia shpreson që ky pilot projekt do të ketë sukses dhe të fillojë të aplikohet në gjithë vendin. Ndërsa, ato pak gra të cilat e dinë çka është PAP-testi, apelojnë te të gjitha grat që ta bëjnë këtë test.
Me PAP-test mund të zbulohen shenjat e hershme të kancerit të qafës së mitrës, ndërsa nëse zbulohet me kohë, trajtimi është më i thjeshtë.
Rekomandohet që të fillohet me PAP testin menjëherë, kur do të bëheni seksualisht aktive dhe nëse nuk ka faktorë rreziku, të njëjtin ta bëni një herë në vit.