Gjatë raundit të fundit të dialogut me Serbinë, të ndërmjetësuar nga Bashkimi Evropian, Kosova kishte paralajmëruar vendosjen e masës së reciprocitetit për targat, pasi marrëveshja skadonte më 15 shtator dhe se Kosova nuk do ta respektojë atë njëanshëm.
Pas skadimit të marrëveshjes, më 20 shtator, forca të mëdha policore u vendosën në pikën kufitare Jarinjë -Bërnjak për të zbatuar reciprocitetin.
Sipas kësaj veturat me targa të Serbisë do të mund të qarkullojnë në Kosovë vetëm nëse i heqin ato dhe pajisen me targa të përkohshme të Kosovës.
Të gjithë shoferët me targa të lëshuara nga Serbia, duhet të paguajnë 5 euro për targa të përkohshme dhe vlefshmëria e tyre është 60 ditë.
E gjithë kjo krijoi pakënaqësi të serbëve, të cilët janë duke protestuar për dy javë, duke bllokuar rrugën në dy pikat kufitare me Serbinë, Jarinjë dhe Bërnjak.
Kosova po zbatonte një marrëveshje që ishte arritur vite më parë në Bruksel, ndërsa nga Beogradi zyrtar dërgimi i Njësisë Speciale Rosu në veri paraqitej si provokim dhe rrezik.
Beogradi gjatë kësaj periudhe kishte dërguar njësitë e veta ushtarake, automjete të blinduara dhe helikopterë në afërsi të pikëkalimeve. Ka pasur madje edhe fluturime të avionëve në afërsi të vijës kufitare.
Kjo kishte ngjallur reagime të shumta në vend, ndërsa faktori politik i Kosovës kishte kërkuar edhe reagimin e bashkësisë ndërkombëtare për veprimet e Serbisë.
Gjatë javës së kaluar, madje është djegur edhe qendra e Regjistrimit të Automjeteve në Zubin Potok.
Ministri i Brendshëm Xhelal Sveçla kishte njoftuar se në ora 01:00 pas mesnate, është djegur Qendra e Regjistrimit të Automjeteve e cila gjendet në objektin e komunës në Zubin Potok.
“Policia e Kosovës ka dalë menjëherë në vendin e ngjarjes dhe së shpejti do të kemi më shumë informata”, ka njoftuar ministri.
Po ashtu, në Qendra e Regjistrimit Civil në Zveçan janë gjetur mjete shpërthyese.
“Këto veprime kriminale tregojnë më së miri se çfarë do të ndodhte në pikat kufitare në Jarinjë dhe Bërnjak nëse nuk do të kishim praninë e njësive speciale për të garantuar rend dhe siguri.
Ministria e Punëve të Brendshme me agjencitë e saj angazhohet për rend, siguri dhe sundim të ligjit dhe është garant i vendimeve sovrane të Qeverisë së Republikës së Kosovës dhe përkundër veprimeve të tilla do të vazhdoj me angazhim të plotë në zbatimin e vendimit në tërë territorin e Republikës së Kosovës”, ishte shprehur Sveçla.
Ndryshe, afro dy javë pas vendosjes së barrikadave në dy pikat kufitare, të mërkurën më 30 shtator Kosova dhe Serbia arritën marrëveshje.
Me këtë marrëveshje, sot, më 2 tetor Njësia Speciale që aktualisht është në pikat kufitare Jarinjë dhe Bërnjakë, do të largohen dhe në të njëjtën kohë do të largohen edhe bllokimi i rrugëve, duke filluar nga ora 08:00, por jo më vonë se ora 16:00. KFOR-i do të vendoset në Jarinjë dhe Bërnjakë, para fillimit të tërheqjes së sinkronizuar të Njësive Speciale dhe barrikadave, dhe do të qëndrojnë atje afërsisht dy javë për të ofruar ambient të qetë dhe të sigurt, si dhe për të mundësuar lëvizjen e lirë.
Më datën 4 tetor, të hënën në ora 08 të mëngjesit do të fillojë zbatimi i përkohshëm i sistemit të afisheve me të cilat si Kosova ashtu edhe Serbia do të mbulojnë elementet shtetërore të targave të njëra tjetrës.
Po ashtu, do të krijohet një grup punues i përbërë nga përfaqësues të BE-së, Beogradit dhe Prishtinës, të kryesuar nga BE-ja do të formohet për të gjetur një zgjidhje përfundimtare rreth targave, bazuar në standarded dhe praktikat e BE-së.
Takimi i parë i këtij grupi do të mbahet më 21 tetor 2021 në Bruksel. Brenda gjashtë muajve nga takimi i parë, grupi punues do të paraqet të gjeturat për zgjidhjen përfundimtare para përfaqësuesve të nivelit më të lartë në procesin e Dialogut.
Arritja e marrëveshjes Kosovë-Serbi është përshëndetur edhe nga bashkësia ndërkombëtare. /Telegrafi/