Deputeti nga Partia Liberale Egjiptiane, Veton Berisha dhe Hetem Arifi nga Partia e Ashkalinjve për Integrim kërcënojnë se do të largohen nga koalicioni i Qeverisë Haradinaj.
Berisha dhe Arifi kërkojnë që brenda 24 orëve të korrigjohet konkursi për policë të rinj të Kosovë, në të kundërtën do të detyrohen ta braktisin koalicionin qeverisës.
“Me dashje apo pa dashje me qëllim apo pa qëllim, Policia e Kosovës dhe Ministria e Punëve të Brendshme e diskriminon dhe përjashton nga Konkursi Publik i Policisë së Kosovës kandidimin e pjesëtarëve nga komuniteti Egjiptian dhe Ashkali”, thuhet në deklaratën e nënshkruar nga deputeti Berisha.
“Siç shihet nga formulari i aplikimit Egjiptianët dhe Ashkalitë nuk e kanë mundësinë të kandidojnë pasi që i është mohuar e drejta e deklarimit të përkatësisë etnike për dallim me komunitetet tjera”, thuhet në deklaratë.
“Ne deklarojmë se kurrë nuk do e lejojmë këtë praktikë diskriminuese nga e kaluara. Ne jemi kategori kushtetuese deri sa në konkurs përfshihen kategori jo kushtetuese ( Qerkez dhe Kroat ) dhe ky gabim është i pafalshëm” .
“Egjiptianët dhe Ashkalinjët institucionin e Policisë së Kosovës e konsiderojnë si institucion kredibil dhe nuk e presin përjashtimin nga ky institucione”.
“Publikisht unë dhe kolegu im deputet z. Hetem Arifi deklarohemi nëse ky gabim nuk korrigjohet brenda 24 orëve, ne do të largohemi nga koalicioni Qeveritar i Qeverisë Haradinaj”, thuhet në deklaratën e deputetit Berisha. /Telegrafi/