Përzgjedhësi i Kosovës, Bernard Challandes e ka publikuar listën e futbollistëve për tri ndeshjet e muajit nëntor.
Kosova luan ndeshje miqësoren kundër Shqipërisë (11 nëntor), pastaj dy ndeshje e fundit në kuadër të Grupit 3 të Ligës C në Ligën e Kombeve kundër Sllovenisë (15 nëntor) dhe Moldavisë (18 nëntor).
Përzgjedhësi Challandes për këto tri ndeshja ka ftuar 27 futbollistë, si dhe dy lojtarë i ka në listën rezervë.
Për herë të parë janë ftuar Betim Fazliji nga klubi zviceran St.Gallen, i cili luan në pozitën e mbrojtësit dhe mesfushorit fundor dhe sulmuesi Mirlind Daku, i cili këtë sezon ka shkëlqyer në Superligën e Kosovës.
Betim Fazliji, futbollisti që luan në dy pozicione
Betim Falziji është i lindur në Luginën e Preshevës dhe vjen nga fshati Tërrnoc. Karrierën e ka nisur në futbollin zviceran dhe është vetëm 21 vjeç.
Në qershor të vitit 2019, Fazliji e ka nënshkruar kontratën e parë profesionale, ndërsa ka debutuar në korrik të vitit 2019 me klubin e tij St Gallen.
Këtë sezon ai i ka zhvilluar të gjitha ndeshjet me ekipin e parë (gjashtë), ku ka shënuar edhe një gol.
Ai luan si mbrojtës, por lehtësisht mund të luajë edhe si mesfushor fundor.
Ka disa paraqitje me grupmoshat e Zvicrës, ndërsa ka vendosur që ta përfaqësojë Kosovën.
Mirlind Daku, mbreti i golit në Superligë
Sulmuesi 22 vjeçar i Ballkanit, Mirlind Daku ka habitur të gjithë këtë sezon, me paraqitjet e tij në Superligë.
Në 10 ndeshje në Superligë, ai ka arritur të tund rrjetën 17 herë, duke bërë që të gjithë të kthejnë kokën kah ai.
Daku është nën kontratë me klubin kroat Osjek, ndërsa është në huazim te Ballkani. Ai në ndeshjen e fundit të Kosovës U21 shënoi gol kundër Andorrës, ku dardanët e rinj fituan me golin e tij.
Ai karrierën e ka nisur në Gjilan, ndërsa në Superligë ka debutuar te Hajvalia, për të kaluar pastaj te Llapi.
Dardanët do të grumbullohen më 9 nëntor në Durrës, ku do t’i zhvillojnë përgatitjet për miqësoren me Shqipërinë. /Telegrafi/