Suedezi i pabesueshëm, Armand Duplantis theu mbrëmë (e hënë) në Paris rekordin botëror në kërcim me shtizë për të nëntën herë në karrierën e tij, duke arritur kështu medaljen e artë në Lojërat Olimpike 2024.
Duplantis u hodh mbi shirit në një lartësi joreale prej 6.25 metrash dhe tejkaloi sërish veten duke thyer rekordin botëror për të nëntën herë edhe pse është vetëm 24 vjeç.
Mbrëmjen e djeshme, Duplantis jo vetëm që ka gëzuar publikun me kërcimin e tij, por edhe me festimin e një rekord të ri, sepse vendosi të imitojë turkun Yusuf Dikecin, njeriun që u bë një sensacion i vërtetë në Lojërat Olimpike të kësaj vere.
Dikec garoi në gjuajtjen me pistoletë ajrore në dhjetë metra, ku së bashku me Shevala Tarhan i sollën Turqisë medaljen e argjendtë.
Qitësi turk fitoi simpatinë e fansave pasi qëlloi pa pajisje shtesë, përveç tapave, ndërsa dorën tjetër e mbajti në xhep duke goditur objektivin.
Pas kërcimit të mbrëmshëm, Duplantis është ndalur dhe ka imituar qëndrimin e Dikecit dhe fotot tashmë janë bërë virale në rrjetet sociale.
An entire stadium of 80 thousand people cheering to witness history
only 1 test happening
only 1 athlete competing
Armand Duplantis 🇸🇪 and the highest jump in human history: 6.25m#Worldrecord #Duplantis pic.twitter.com/bbpSuvjQWb— The Specifications (@TheSpecificati1) August 5, 2024
Meqë ra fjala, amerikani Sam Kendricks fitoi mbrëmë medaljen e argjendtë me një kërcim prej 5.95 m, kurse Emmanouil Karalis medaljen e bronztë me një kërcim prej 5.90 m.
Për herë të parë, Duplantis theu rekordin botëror në shkurt të vitit 2020, kur kaloi shiritin në lartësinë 6.17 metra dhe që atëherë e ka përmirësuar me një centimetër shtatë herë të tjera radhazi. /Telegrafi/