Duke tentuar të parandalojë vjedhjen e veturës, gruaja nga SHBA përfundoi në spital – pamjet e kamerave të sigurisë regjistruan gjithçka

Një hajn në SHBA gjatë vjedhjes së veturës ka “marrë me vete” edhe pronaren e mjetit, derisa tentoi të parandalojë vjedhjen.

Gjithçka ndodhi të dielën pasdite në një pompë të derivateve në Bristol të Connecticut, transmeton Telegrafi.

Policia amerikane ka publikuar pamjet e kamerave të sigurisë, dhe i ka bërë thirrje qytetarëve që t’i lajmërojnë nëse kanë çfarëdo informacioni për veturën e vjedhur apo hajnin.

Ata shtuan se pronarja e veturës pas incidentit është dërguar në spital për trajtim, për shkak të disa gërvishtjeve që i ka pësuar në duar.

Koloneli Geoffreu Lund ka bërë të ditur se policia është vënë në kërkim të veturës së zezë Dodge Charger, me targat e Massachusetts 2CTP85. /Telegrafi/