Drita ka fituar si mysafir i Ballkanit me rezultat 2-0 në kuadër të javës së gjashtë në Albi Mall Superligë.
Në ndeshjen e zhvilluar në stadiumin “Rexhep Rexhepi”, Ballkani si vendas kishte vendosur të bëjë shumë ndryshime.
Trajneri Ilir Daja kishte vendosur të pushonte tetë lojtarë nga formacioni bazë pas ndeshjes me Cluj, pasi edhe në mesjavë do të luajnë, kësaj radhe si mysafir i Slavia Pragë në Ligën e Konferencës.
Kjo i konvenoi Dritës duke i ditur cilësitë e kësaj të fundit, duke filluar që në start në sulm.
Blend Baftiu dhe Marko Simonovski humbën raste të mira, para se të vinte goli i parë në ndeshje.
Zhvillohej minuta e 31-të, kur Almir Ajzeraj asistoi te Simonovski që godet me të parë nga brenda zonës për të shënuar për 1-0.
Pjesa e parë nuk solli më gola, ndërsa e dyta ishte edhe më e mirë. Drita fitoi penallti në minutën e 59-të, ku nga pika e bardhë ishte i saktë Besnik Krasniqi për 2-0.
Ilir Daja futi në lojë në pjesën e dytë disa nga lojtarët kryesor, ndërsa rast të mirë për gol kishin Albin Berisha dhe Ermal Krasniqi, por në të dyja rastet Faton Maloku ishte në vend.
Drita me kët fitore njitet në vendin e dytë me 11 pikë, ndërsa Ballkani ka 9 pikë. /Telegrafi/
