Drita ka arritur ta fitojë klasiken e futbollit kosovar, pasi ka mposhtur Prishtinën në kryeqytet me rezultat 0-1.
Ka qenë një ndeshje jashtëzakonisht e mirë nga dy skuadrat rivale në ‘Fadil Vokrri’, por që është vendosur nga një gol në pjesën e parë.
Ishte minuta e 36-të vendimtare në këtë takim, kur Arbnor Muja asistoi për mrekulli te Marko Simonovski që realizoi për 0-1.
Drita pati rast tjetër të mirë me Hamdi Namanin, por që goditja e tij nga afërsia shkoi jashtë portës.
Edhe kryeqytetasit rrezikuan deri në fund të ndeshjes, por pa sukses pasi mbrojtja e gjilanasve ishte në nivel.
Kësisoj Drita arrin ta mposhtë Prishtinën pas shtatë ndeshjeve pa fitore.
Me këtë fitore, Drita zë vendin e tretë në tabelë me 31 pikë, dy më pak se Ballkani, derisa Prishtina mbetet në vendin e pestë me 24 pikë.
Në javën e ardhshme kryeqytetasit i pret një udhëtim shumë i vështirë, pasi zhvillojnë derbin rajonal me Llapin.
Ndërkohë Drita në xhiron e 18-të e pret Ulpianën në Gjilan. /Telegrafi/