Drenica ka fituar me rezultat të thellë 3-0 në shtëpi ndaj Dukagjinit në ndeshjen e vlefshme për javën e 11-të në Superligën e Kosovës.
Kuqezinjtë nga Skenderajt kanë shfrytëzuar terrenin vendas për t’iu kthyer fitores pas një humbje dhe tri barazimeve radhazi.
Pjesa e parë e ndeshjes u karakterizua me raste të mysafirëve, por goli i vetëm u shënuan nga vendasit.
Ishte Harmon Gbowea (25′), i cili përfitoi nga një harkim i Genc Hamitit dhe me kokë realizoi për 1-0.
Në pjesën e dytë u zhvillua lojë e barabartë, por përsëri ishin vetëm drenicasit që gjetën golin me anë të Diar Mustafës (57′), i cili shënoi për 2-0, ndërsa Harmon (88′) vulosi fitoren 3-0.
Pas kësaj fitore, kuqezinjtë kanë 14 pikë në vendin e shtatë, teksa klinasit kanë shtatë pikë në vendin e 11-të.
Në ndeshjen e radhës, Drenica e pret në shtëpi Feronikelin, ndërsa Dukagjini udhëton te Ballkani. /Telegrafi/