Drejtuesit e Komitetit Olimpik të Kosovës, presidenti Besim Hasani dhe sekretari i përgjithshëm, Shasivar Haxhijaj, kanë takuar sot (e hënë) ministren për Kulturë, Rini e Sport, Vlora Dumoshi, e cila shoqërohej nga bashkëpunëtorët e saj.
Qëllimi i takimit ishte bashkëpunimi dhe bashkërenditja e aktiviteteve, në interes të sportit – thuhet në njoftimin e KOK-ut.
Të dyja palët u dakorduan për domosdoshmërinë e fillimit të aktiviteteve sportive, sa më shpejt që është e mundur, duke zbatuar me përpikëri protokollet përkatëse të dala nga Ministria e Shëndetësisë dhe Instituti Kombëtar Shëndetësor, në lidhje me pandeminë COVID-19.
U diskutua edhe për pakon emergjente të ndarë nga Qeveria e Republikës së Kosovës për sportin, për çka u dakorduan që të gjendet modeli më i përshtatshëm për ndarjen e ndihmës emergjente për organizatat sportive.
Një tjetër çështje që u diskutua dhe u arrit pajtueshmëri e plotë, ishte që si KOK, ashtu edhe MKRS, t’i bëjnë thirrje Qeverisë së Kosovës për mbështetjen e funksionimit të Agjencisë Kombëtare për Anti-Doping “KosADA”.
