Drejtuesit e KOK-ut, presidenti Ismet Krasniqi dhe sekretari i përgjithshëm, Besim Aliti, kanë pritur ambasadoren për sport në Republikën e Francës, Laurence Fischer, e cila po e viziton Kosovën.
Duke falënderuar ambasadoren Fischer për vizitën bërë KOK-ut, Krasniqi e njohu me aktivitetet dhe sukseset, me theks të veçantë medaljet e arta olimpike. Presidenti theksoi se synimet e tanishme janë Lojërat Olimpike Paris 2024, ku KOK-u po i mbështet me bursa olimpike 22 sportistë, nga të cilët pritjet janë të fitohen sa më shumë norma olimpike, e më pas edhe medalje.
Nga ana e saj, ambasadorja Fischer vlerësoi lartë të arriturat e sportistëve tanë, derisa shprehu kënaqësinë që Franca do të organizojë Lojërat e ardhshme Olimpike, duke shtuar se mikpritja për ekipin olimpik të Kosovës do të jetë në nivel të lartë – thuhet në njoftimin e KOK-ut.
Palët diskutuan po ashtu mundësinë që sportistët tanë të marrin pjesë në kampe të ndryshme që organizohen në Francë, para LO Paris 2024.
Ambasadorja shoqërohej në takim edhe nga përgjegjësja për bashkëpunim me Ambasadën e Francës, Cecilia Maronnier, si dhe menaxherja e projektit në delegacionin për sport të Ministrisë së Francës për Evropë dhe Punë të Jashtme, Marie Roy, kurse nga KOK-u në takim mori pjesë edhe zyrtarja për marrëdhënie ndërkombëtare, Rejhan Halili.
Njëherësh, drejtuesit e KOK-ut bashkë me zëvendësministren Daulina Osmani, janë pritur nga ambasadorja e Francës në Prishtinë, Marie-Christine Butel.
E pranishme në takim ishte edhe ambasadorja për sport në Republikën e Kosovës, Laurence Fischer, e cila po e viziton Kosovën.
Palët kanë biseduar për sfidat e sportit të Kosovës, aktivitetet e KOK-ut, sukseset dhe rrugën drejt Lojërave Olimpike Paris 2024.
Gjatë kësaj jave po mbahet “Java e Frankofonisë” në Kosovë, që po organizohet nga Ambasadat e Francës, Zvicrës, Luksemburgut në Kosovë dhe zyrave të Belgjikës e Kanadasë.
