Drejtori i Informacionit në RTVOra, Brahim Shima deklaroi se vendimi i Inspektoratit Shtetëror Shëndetësor për gjobitjen është marrë vetëm nga dy foto.
“Nuk mund ti mbyllësh gojën sedo të flasë. Nuk po mbyll biznesin por po mbyll fjalën e lirë. Kemi qenë të ndershëm përballë shikuesve dhe beteja do të vazhdojë. Vendimi për mbylljen dhe lënien afat për 30 ditë të ankimimit të këtij vendimi po në këtë institucion është skandaloz”, tha ai.
Një ditë pas gjobitjes në mënyrë të paprecedentë me 20 milionë lekë ISHSH ndërmerr dhe një hap tjetër të rëndë duke kërkuar mbylljen e sinjalit të RTV Ora.
Po ashtu, Qendra Evropiane për Liri të Shtypit dhe të Medies ka reaguar në lidhje me vendimin për mbylljen e televizionit ORA.
Përmes një postimi në Twitter, ky institucion shprehet se është e shqetësuar për këtë vendim.
Sipas tyre, mbyllja e sinjalit të transmetimit të RTV ORA është një rast i paprecedent dhe se të thuash të vërtetën në Shqipëri është shumë e vështirë.
”Qendra Evropiane për Liri të Shtypit dhe të Medias është e shqetësuar me urdhrin për mbylljen e RTV ORA në Shqipëri për shkak të ‘mosrespektimit’ të masave të Covid19. Derisa të mbledhim më shumë info, lexoni raportin tonë për Shqipërinë. Të thuash të vërtetën në Shqipëri është e vështirë sidomos në këto kohë. Një rast i paprecedentë po ndodh. Inspektoriati Shtetëror Shëndetësor kërkon mbylljen e sinjalit të transmetimit të RTV Ora.”
