Organizata Botërore e Shëndetësisë ka paralajmëruar se varianti Omicron po “përhapet me një ritëm që nuk e kemi parë me asnjë variant të mëparshëm”, pasi i bëri thirrje botës të përdorë të gjitha mjetet në dispozicion për të luftuar pandeminë e coronavirusit.
“Duhet të jem shumë i qartë: vetëm vaksinat nuk do të nxjerrin asnjë vend nga kjo krizë”, ka thënë drejtori i përgjithshëm i OBSH-së, Tedros Adhanom Ghebreyesus, shkruan Euronews, përcjell Telegrafi.
“Nuk janë vaksinat në vend të maskave, distancimin, ventilimit ose higjienës së duarve. Bëni të gjitha. Bëjeni vazhdimisht. Bëjeni mirë”, citohet të ketë thënë ai në një konferencë për media të martën.
Ai theksoi edhe një herë pabarazinë e vaksinimit, me shumë vende perëndimore që garojnë për të shpallur fushata të vaksinave përforcuese, ndërkohë që shumë vende më të varfra ende nuk i kanë administruar dozat e para.
Omicron is spreading at a rate we have not seen with any previous variant. I need to be very clear: vaccines alone will not get any country out of this crisis.
It’s not vaccines instead of masks, distancing, ventilation or hand hygiene.
Do it all. Do it consistently. Do it well. pic.twitter.com/YAVfJXsviQ— Tedros Adhanom Ghebreyesus (@DrTedros) December 14, 2021
“Më lejoni të jem shumë i qartë: OBSH nuk është kundër dozave përforcuese. Ne jemi kundër pabarazisë së vaksinave”, tha Dr Tedros.
“Është një çështje prioriteti. Dhënia e dozave përforcuese për grupet me rrezik të ulët të sëmundjes së rëndë ose vdekjes thjesht vë në rrezik jetën e atyre me rrezik të lartë që janë ende në pritje të dozave të tyre të para”, këmbënguli ai.
Ai vuri në pah se 41 vende ende nuk kanë arritur të vaksinojnë 10 për qind të popullsisë së tyre dhe 98 vende nuk e kanë arritur shifrën prej 40 për qind.
“Nëse i japim fund pabarazisë, i japim fund pandemisë. Nëse lejojmë që pabarazia të vazhdojë, ne lejojmë që pandemia të ecë përpara”, këmbënguli ai. /Telegrafi/