Gjykata e Apelit të Posaçëm ka vendosur të lërë në fuqi masat e sigurisë “arrest në burg” për ish-gjyqtaren e Elbasanit, Pajtime Fetahu dhe për vëllezërit Xhino e Marsel Roka, të cilët cilësoheshin si “ushtarë” të bandës së Suel Çelës.
“Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtari Dhimitër Lara, sot më 14.01.2025, shpalli vendimin mbi çështjen penale nr. 2 akti, datë 06.01.2025 regjistrimi, mbi ankimin e personave nën hetim M.R., Xh.R., E.Q., P.F., me objekt: “Ankim ndaj vendimit nr. 138, datë 22.11.2024 dhe nr. 146, datë 27.11.2024, të Gjykatës së Posaçme të Shkallës së Parë për Korrupsionin dhe Krimin e Organizuar”, disponuar në lëndë të masave të sigurimit personal, dhe vendosi: “Miratimin e vendimit n.138 datë 22/11/2024 dhe vendimit n.146 datë 27/11/2024 të Gjyqtarit që shqyrton kërkesat e palëve gjatë hetimeve paraprake në Gjykatën e Posaçme të Shkallës së Parë për Korrupsionin dhe Krimin e Organizuar, për të hetuarit apelues z.M..R., z.Xh.R. dhe znj.P.F.”.
Përmes të njëjtit vendim Apeli shfuqizoi masën “detyrim për paraqitje” që shkalla e parë vendosi ndaj gazetarit Elton Qyno.
“Gjykata e Posaçme e Apelit për Korrupsionin dhe Krimin e Organizuar vendosi shfuqizimin e vendimit n.138 datë 22/11/2024 dhe vendimit n.146 datë 27/11/2024 të Gjyqtarit që shqyrton kërkesat e palëve gjatë hetimeve paraprake në Gjykatën e Posaçme të Shkallës së Parë për Korrupsionin dhe Krimin e Organizuar, për të hetuarin apelues z.E.Q.”.
Ndaj Qynos ishte në fuqi masa detyrim paraqitje për veprën penale korrupsion pasiv në sektorin privat, në kuadër të procedimit penal për dosjen e Suel Çelës.