Zëvendësdrejtori i Policisë së Kosovës për rajonin e Veriut, Veton Elshani, ka dhënë detaje lidhur me djegien e veturës me targa serbe që ndodhi sot në Leposaviq.
Elshani, në RTV Dukagjini, ka thënë se Policia e Kosovës ka reaguar menjëherë se bashku me zjarrfikësit, pas pranimit të informacioneve.
“Sipas informacioneve që ne kemi, diku rreth orës 04:00, në mëngjes, kemi pranuar informacione që është duke u djegur një veturë afër shkollës teknike në qytetin e Leposaviqit. Policia ka reaguar bashkë me zjarrfikësit dhe ka hasur në një veturë që është duke u djegur, ndërsa janë dëmtuar edhe dy vetura tjera që kanë qenë afër, por më dëme më të vogla materiale”, ka thënë Elshani.
Ai është pyetur se nëse kjo ka ndodhur për shkaqe politike por ai u përgjigj se nuk e beson një gjë të tillë, derisa tregon se ka raste shumë interesante që ndodhin në veri e që nuk kanë të bëjnë me politikë, më të cilat përballen çdo ditë.
Ndërsa për situatën në Zveçan pas largimit të trupave të KFOR-it, ai ka thënë se është e qetë.
“Policia ka numër të mjaftueshëm, afër dhe rreth komunës, që në rast se ndodh diçka, ne do të jemi aty”, ka thënë tutje zëvendësdrejtori i Policisë së Kosovës për rajonin e Veriut.
Ai ka thënë se kanë një bashkëpunim shumë të mirë me KFOR-in, kanë patrullime të përbashkëta, dhe se sipas tij, ata janë partnerë të besueshëm.
Në mëngjesin e sotëm, një veturë me targa serbe është djegur në Leposaviq.
Në lidhje me rastin nuk është arrestuar ende ndonjë i dyshuar, teksa rasti është iniciuar si “Zjarrvënie”.