Deputetja e Lidhjes Demokratike të Kosovës (LDK), Hykmete Bajrami ka thënë se Qeveria Kurti nuk e ka vëmendjen ndaj qytetarëve të saj.
Bajrami gjatë seancës parlamentare ku po diskutohet ndaj rritjes së çmimeve, ka shtuar se ndërhyrjet joligjore ndaj tregut nuk po prodhojnë asnjë efekt.
“Arsyeja pse kemi ftuar seancë të jashtëzakonshme është në fillim mungesa e çfarëdo vëmendje nga ana e Qeverisë Kurti dhe më pastaj ndërhyrjet joligjore në tregun e lirë të cilat nuk po prodhojnë asnjë efekt”, tha Bajrami, përcjell Telegrafi.
“Jemi dy javë larg faturave të reja të rrymës, ku do të shihni se sa janë ngritur çmimet, e do të na vijnë për tërë muajin”, ka shtuar ajo.
“Qeveria pasi refuzoi gazsjellësin amerikan me 200 milionë euro donacione nuk mori asnjë masë deri më 28 dhjetor të vitit 2021 shpalli situatën emergjente, duke rritur tarifat”, përfundoi Bajrami. /Telegrafi/
