SHBA-ja është vendi më i goditur në botë nga pandemia e coronavirusit, duke regjistruar më shumë se shtatë milionë raste.
Kjo ka ndodhur edhe pse presidenti amerikan, Donald Trump, i cili së fundmi ka rezultuar pozitiv me COVID-19 ka deklaruar se e ka menaxhuar me korrektësi situatën në vend.
Por në listën e mëposhtme gjenden disa prej deklaratave që ai i ka thënë gjatë këtij rrugëtimi.
Më 22 janar (rasti i parë i konfirmuar në SHBA) – “E kemi situatën nën kontroll”.
“Ne e kemi plotësisht situatën nën kontroll. Personi i infektuar vjen nga Kina. Do të bëhet mirë”, ishte shprehur Trump.
Më 9 mars – Trump e krahason coronavirusin me gripin e zakonshëm
“Vitin e kaluar 37 mijë njerëz në SHBA vdiqën nga gripi i zakonshëm. Mesatarisht midis 27 mijë persona e deri në 70 mijë vdesin çdo vit”, pati thënë Trump.
“Asgjë nuk do të mbyllet, jeta dhe ekonomia do të vazhdojnë”, pati theksuar ai.
https://www.youtube.com/watch?v=15XjckAOTwU
Më 31 mars – “Ky nuk është sikurse gripi i zakonshëm”
“Coronavirusi nuk i ngjanë gripit të zakonshëm. Kur njeriu sëmuret dhe dërgohet në spital, shpreson që do bëhet mirë, mirëpo kur e telefonon të nesërmen ai kalon në koma. Ky nuk është grip i zakonshëm”, shprehet ai.
Më 3 prill – “Zgjedh vetë për vendosjen e maskës”
“Vendosja e maskës do të jetë në mënyrë vullnetare. Unë zgjedh të mos e bëj. Është në rregull nëse të tjerët e vendosin atë”, ishte shprehur presidenti amerikan.
Më 21 korrik – “Vendosni maskat”
“Ne po u kërkojmë të gjithëve që nëse nuk jeni në gjendje të respektoni distancimin shoqëror, atëherë vendosni maskat”, ishte shprehur ai.
Më 10 shtator: “Amerika është në fazën finale të pandemisë”
“Po kalojmë në fazën përfundimtare, dhe shumë gjëra të mira po ndodhin me vaksinat dhe me terapitë”, deklaroi Trump. /Telegrafi/