Ministri i Punëve të Jashtme Nikolla Dimitrov, me ftesë të homologut të tij, Nikos Kotzias, do të merr pjesë në takimin e tretë të radhës mes ministrave të Jashtëm të Greqisë, Shqipërisë, Bullgarisë dhe Maqedonisë, që do të mbahet më 3 dhe 4 maj në Selanik.
Siç njoftojnë nga MPJ, përveç ministrave të Punëve të Jashtme, në takim do të marrin pjesë edhe përfaqësues të lartë të Ministrive të Punëve të Brendshme, si dhe Transportit dhe Lidhjeve të katër vendeve, përcjell Telegrafi Maqedoni.
“Pritet që në diskutim në tryezë të rrumbullakët të ministrave të Punëve të Jashtme të hapen temat për rreziqet e Evropës Juglindore, gjendja në Lindjen e Mesme, Mesdhe, si dhe pasojat nga lëvizja e regugjatëve”, thuhet në njoftimin e MPJ-së.
Tema të tjera që do të diskutohen mes ministrive do të jenë edhe çështje që lidhen me bashkëpunimin ndërkufitar në fushat e policisë, doganave dhe mbrojtjes civile, ndërlidhjes dhe rrjeteve të transportit në rajon.
Në njoftimin e MPJ-së nuk theksohet nëse do të ketë takim dypalësh mes shefave të diplomacisë së Maqedonisë dhe Greqisë dhe nëse do të bisedohet për çështjen e emrit./Telegrafi/