Diego Maradona iu nënshtrua një operacioni të suksesshëm të martën në mbrëmje, pasi pësoi sulm në tru – pesë ditë pasi festoi ditëlindjen e tij të gjashtëdhjetë.
Doktori i legjendës argjentinase ka thënë se e gjithë situata ka kaluar me sukses dhe se ai është zgjuar.
“Hematoma u evakuua me sukses. Diego e kaloi mirë operacionin. Ai është zgjuar dhe gjithçka është në rregull”, njoftoi në një konferencë shtypi mjeku i tij Leopoldo Luque.
Tifozët ishin mbledhur në portat e klinikës në qytetin Olivos, duke shpalosur parulla të mëdha që mbanin figura të idhullit të tyre argjentinas.
Diego Maradona kaloi në këtë klinikë pasi një skanim CT zbuloi praninë e hematomës. Doktori ka përsëritur se nxjerrja e një hematome subdurale, e vendosur në kokë, është një operacion rutinë.
“Ai është një pacient i moshuar dhe me shumë presion në jetën e tij. Kjo është një kohë kur duhet ta ndihmojmë. Është shumë e vështirë të jesh Maradona”, ka shtuar ai, para operacionit.
Luque kishte treguar se ish-lojtari vuante nga anemia dhe ishte pak i dehidruar. /Telegrafi/