Trajneri i skuadrës së basketbollit Vllaznia, Bledar Gjeçaj dhe basketbollisti i Tiranës, Erkand Karaj, kanë pasur një përplasje që ka degjeneruar në grushte. Incidenti ndodhi në sfidën e Superligës shqiptare ndërmjet Vllaznisë dhe Tiranë që u zhvillua në Shkodër.
Në një moment, situata tensionohet në sallën sportive dhe në fushë hyjnë të gjithë lojtarët e stolit dhe pjesëtarët e stafeve teknike. Në këtë moment, edhe Gjeçaj e Karaj afrohen dhe ndezin edhe më shumë situatën, njofton Top Channel.
Siç duket në videon që u publikua në rrjetet sociale, ata e grushtojnë njëri-tjetrin. Falë ndërhyrjes së personave të tjerë, kjo përleshje mbetet me aq.
Pas shtensionimit të situatës, ndeshja vijoi dhe Tirana arriti të marrë një fitore 84-66 dhe tashmë kryeson e vetme në klasifikim.
Flamurtari u mposht nga Ardhmëria 82-42, ndërsa Teuta fitoi ndaj Kamzës në shtëpinë e këtyre të fundit me rezultatin 90-83.
