Një burrë në Iran është fshikulluar mbi 80 herë në publik, dhe atë vetëm pse një dekadë më parë kishte konsumuar alkool në një dasmë kur ai ishte vetëm 14-vjeç.
Amnesty International ka dënuar sulmin e tmerrshëm, pasi mediat lokale kanë publikuar imazhe ku shihen një burrë i lidhur në pemë duke u fshikulluar nga një burrë tjetër më maskë, kurse masa po shikonte nga distanca, transmeton Telegrafi.
Fshikullimi ka ndodhur dje (të mërkurën), kur burri i identifikuar vetëm si M.R. është parë duke u goditur mbi 80 herë në sheshin Niazmand në qytetin Kashmar në pjesën verilindore të Iranit.
Sipas prokurorit të Kashmarit, M.R. kishte konsumuar alkool gjatë një dasme të organizuar 10 vite më parë, ku si pasojë e ndikimit të alkoolit ka ardhur deri te një rrahje që ka rezultuar me vdekjen e një 17-vjeçari.
Ai pranoi se M.R. nuk ishte përfshirë në vrasje, por është fshikulluar për konsum të alkoolit. /Telegrafi/