Korporata Financiare Amerikane për Zhvillim Ndërkombëtar (DFC), pas nënshkrimit të marrëveshjes ekonomike në Kosovë, ka njoftuar se do të punohet për të rritur investimet në sektorin privat.
Kështu thuhet në njoftimin e lëshuar pas përmbylljes së vizitës së kryeshefit ekzekutiv Adam Boehlet në Greqi, Kosovë, Serbi, Izrael dhe Marok.
Boehlet ishte shoqëruar edhe nga i dërguari special i presidentit Donald Trump për dialogun Kosovë-Serbi, Richard Grenell si dhe zyrtarë të tjerë amerikanë.
“Delegacioni vizitoi Kosovën dhe Serbinë për të mbështetur marrëveshjet e Uashingtonit të 4 shtatorit që vendosën normalizimin ekonomik midis dy vendeve, një moment i rëndësishëm historik që do të nxisë zhvillimin ekonomik në rajon”, thuhet në njoftim, përcjell Telegrafi.
Duke u ndalur te vizita në Kosovë, DFC thotë se në Prishtinë është nënshkruar një deklarate ku theksohet se do të punohet për të forcuar infrastrukturën ajrore, hekurudhore dhe rrugore.
“Në Kosovë, DFC nënshkroi një deklaratë të përbashkët me qeverinë dhe do të punojë për të rritur investimet e sektorit privat në Kosovë për të forcuar infrastrukturën ajrore, hekurudhore dhe rrugore; si dhe industritë e tjera si energjia, teknologjia dhe turizmi”, vijon njoftimi.
Në Serbi, DFC thotë se nënshkroi një deklaratë të përbashkët me qeverinë dhe njoftoi se do të hapë një zyrë rajonale në Beograd për të lehtësuar zbatimin e projekteve që do të mbështesin rritjen ekonomike.
DFC gjithashtu emëroi John Jovanoviq, i cili ka një përvojë të gjerë në Ballkan, do të jetë drejtori i ri menaxhues i DFC për Ballkanin Perëndimor dhe Egje. /Telegrafi/