Në mungesë të ministrit së Punëve të Brendshme, Xhelal Sveçla dhe deputetes Fitore Pacolli-Dalipi, ka dështuar të nis gjykimi ndaj tyre dhe deputetëve të Vetëvendosjes, Salih Zyba dhe Drita Millaku, të cilët po akuzohen se në mars të 2018-ës kishin ndezur gaz lotsjellës, me ç‘rast kishin pamundësuar mbajtjen e seancës plenare në Kuvendin e Kosovës.
Ministri Sveçla dhe tre deputetët nga radhët e LVV-së, Millaku, Zyba dhe Pacolli-Dalipi po akuzohen se më 21 mars 2018, rreth orës 12:10 e deri në orën 15:40, kanë ndezur disa bombola të gazit lotsjellës, të cilat i kishin hedhur brenda sallës së Kuvendit të Kosovës, ku po mbahej seanca plenare e si rrjedhojë e kësaj, të gjithë deputetët ishin detyruar ta lironin sallën e Kuvendit.
Lidhur me mungesën e të akuzuarve, Svelça dhe Pacolli-Dalipi, gjykatësi i rastit Sabit Sadikaj deklaroi se gjykata nuk ka dëshmi nëse të njëjtit janë ftuar në mënyrë të rregullt.
Tutje, gjykatësi Sadikaj tha se varësisht nga fletëkthesat të cilat do të kthehen në gjykatë, gjykata do t’i ndërmarrë të gjitha veprimet procedurale konfrom dispozitave ligjore.
Ndërsa, të pranishëm në këtë seancë ishin prokurori Blerim Igrishta dhe të akuzuarit Millaku e Zyba.
Meqenëse nuk u plotësuan kushtet për mbajtjen e kësaj seance, seanca fillestare për këtë rast u shty në kohë të pacaktuar, raporton “Betimi për Drejtësi“.
Ndryshe, në tetor të vitit 2021 është raportuar për aktakuzën e ngritur ndaj ministrit Sveçla dhe deputetëve Millaku, Zyba dhe Pacolli-Rexhepi.
Sipas aktakuzës, e cila rezulton të jetë ngritur më 29 korrik 2019, Sveçla, Millaku, Zyba dhe Pacolli-Dalipi po akuzohen se më 21 mars 2018, rreth orës 12:10 e deri në orën 15:40, kanë ndezur disa bombola të gazit lotsjellës, të cilat i kishin hedhur brenda sallës së Kuvendit të Kosovës, ku po mbahej seanca plenare.
Aty thuhet se si rrjedhojë e kësaj, të gjithë deputetët ishin detyruar ta lironin sallën e
Kuvendit, me ç’rast kanë pamundësuar vazhdimin e seancës.
Me këtë, secili veç e veç akuzohen se kanë kryer veprën penale “Përdorimi i armës apo mjetit të rrezikshëm” nga neni 375, paragrafi 1 të Kodit Penal, kryerësi i së cilës dënohet me burgim prej një deri në tetë vjet.
Kurse, sipas dispozitivit të dytë, thuhet se secili veç e veç kanë kryer veprën penale “Pengimi i personit zyrtar në kryerjen e detyrave zyrtare” nga neni 409, paragrafi 1 të Kodit Penal, pasi kanë penguar deputetët e Kuvendit të Kosovës ne kryerjen e detyrave zyrtare. Kryerësi i kësaj vepre dënohet me burgim prej tre muaj deri në tre vjet.