Ambasadori gjerman në Kosovë, Jorn Rohde ka reaguar lidhur me mosmiratimin e Projektligjit për Rimëkëmbje nga Kuvendi i Kosovës, që ka të bëjë me zbatimin e Pakos Ekonomike në vlerë prej 365 milionë eurove.
Rohde në një shkrim në Twitter ka thënë se, dështimi për herë të pestë i këtij Projektligji është rast i veçantë në Evropë, dhe se qytetarët e Kosovës me të drejtë e presin miratimin e tij.
“Lufta kundër efekteve negative ekonomike të pandemisë është një përgjegjësi e përbashkët dhe kërkon përpjekje të përbashkëta. Në këtë drejtim është mjaft zhgënjyese, dhe për aq sa kam njohuri, është rast i veçantë në Evropë që për herë të pestë në Kuvendin e Kosovës nuk u votua Projektligji për Rimëkëmbjen Ekonomike. Ajo që u duhet urgjentisht të gjithë palëve, është fryma e kompromisit. Qytetarët e Kosovës me të drejtë e presin atë”, ka shkruar Rohde, përcjell Telegrafi.
…for the 5th time in the Kosovo assembly there was no agreement on the draft Economic Recovery Law. What is urgently needed from all stakeholders is the spirit of compromise. The citizens of Kosovo rightfully expect that. (2/2)
— Ambassador Jörn Rohde (@GermanAmbKOS) September 30, 2020
Në seancën e fundit, deputetët e Kuvendit të Kosovës kanë dështuar që ta votojnë këtë Projektligj, ku morën pjesë në votim vetëm 48 deputetë, ndërsa votimi për këtë Projektligj është bartur për seancën e radhës.
Ky Projektligj, po ashtu nuk kishte marrë votat në lexim të parë as në muajin gusht, pasi Lëvizja Vetëvendosje dhe Partia Demokratike e Kosovës refuzuan ta votojnë ndonëse ministrja e Financave, Hykmete Bajrami bëri thirrje për votimin e tij.
Ky Projektligj, parasheh plotësimin e një sërë ligjesh, i cili përfshinë edhe tërheqjen e 10-përqindëshit nga vetë qytetarët nga Fondi i Kursimeve Pensionale.
Me anë të këtij Projektligji parashihet zbatimin e Pakos së Rimëkëmbjes Ekonomike në vlerë prej 365 milionë euro. /Telegrafi/