Fajin për dështimin në arritjen e kontratës për Brezovicën, Qeveria po e hedh tek opozita dhe veprimet e saj gjatë gjithë sesionit vjeshtor të Kuvendit të Kosovës. Madje, Express ka mësuar se Qeveria nuk e thotë të vërtetën as për mobilizimin e 100 milionë eurove nga kompania garuese
Ministrja e Tregtisë dhe e Industrisë, Hykmete Bajrami, sot gjatë prezantimit të punës së Ministrisë së saj për vitin 2015, ka bërë të ditur se është shtyrë afati i sjelljes së dokumentacionit për projektin e zhvillimit të kompleksit turistik “Brezovica”. Afati është shtyrë deri më 31 maj të vitit të ardhshëm.
Ndonëse janë marrë vesh që të mos ketë shtyrje të tjera, Ministrja për këtë shtyrje e ka fajësuar opozitën, gjendjen politike dhe gazin lotsjellës në Kuvend, të cilat ka thënë se kanë qenë ndër arsyet që konzorciumi ka kërkuar zgjatje të afatit.
Bajrami ka deklaruar që konzorciumi ka mobilizuar rreth 100 milionë euro dhe janë në negociata edhe me kompani të tjera, të cilat kanë kërkuar të takohen edhe me institucionet e Republikës së Kosovës.
Sa i përket kësaj, Express ka mësuar se Qeveria nuk po e thotë të vërtetën për këtë mobilizim financiar të kompanisë garuese.
Dorëzimi i dokumentacionit përkatës për zhvillimin e “Brezovicës”, ishte paraparë të bëhej në janar të vitit 2016. /Telegrafi/