Zëdhënësi i Dhomave të Specializuara të Kosovës (DhSK) në Hagë, Michael Doyle ka thënë se dëshmitari i 30-të në rastin e Thaçit dhe të tjerëve ka thënë se dëshmitari i 30-të, një ish-pjesëtar i UÇK-së, ka dhënë dëshmi kryesisht për strukturën komanduese të UÇK-së në Shqipëri dhe në Zonën e Pashtrikut.
Këtë deklarim Doyle e ka dhënë të enjten përmes informimit javor të DhSK-së për media, ku ka folur për aktivitetet kryesore të realizuara në këtë gjykatë gjatë një jave.
“Dëshmitari i 30-ë i thirrur nga Prokuroria, dëshmitar i mbrojtur i cili deri tani ka dhënë dëshmi kryesisht në seancë private. Sipas përmbledhjes të lexuar në sallë të gjyqit, dëshmitari është ish-anëtar i UÇK-së dëshmia e të cilit ka të bëjë, ndër të tjera, me strukturën komanduese të UÇK-së në Shqipëri dhe në zonën e Pashtriku”, tha ai.
Ai tha se në të njëjtën çështje gjyqësore, më 10 tetor, Trupi Gjykues miratoi kërkesën e Prokurorisë që një dëshmitar të dëshmojë përmes videokonferencës dhe më 11 tetor miratoi pjesërisht një kërkesë tjetër të Prokurorisë që edhe një dëshmitar tjetër të dëshmojë përmes videokonferencës.
“Më 11 tetor, Trupi Gjykues miratoi kërkesën e Mbrojtjes së Krasniqit për pranimin si provë të një dokumenti shtesë që lidhet me dëshminë e një dëshmitari”, tha ai.
Doyle bëri me dije se gjithashtu, Trupi Gjykues miratoi kërkesën e Prokurorisë për kufizimin e kuadrit të marrjes në pyetje të dy dëshmitarëve në tema të caktuara, në bazë të rregullës 107.
“Kjo rregull përcakton se në qoftë se Prokuroria ka marrë informacion në mënyrë konfidenciale dhe vetëm për mbledhjen e provave të reja, informacioni nuk duhet të nxirret pa pëlqimin e dhënësit. Në qoftë se Prokuroria thërret dëshmitar në kuadër të kësaj rregulle, ajo mund të kufizojë edhe kuadrin e pyetjeve”, tha ai.
Zëdhënësi i Dhomave të Specializuara të Kosovës (DhSK) në Hagë, Michael Doyle, tha se seancat në çështjen gjyqësore Thaçi dhe të tjerët rifillojnë të hënën, 16 tetor, në orën 09:00 dhe janë planifikuar të vazhdojnë deri të enjten.