Toyota Australia ka njoftuar se do të shpërndajë një rrjet të mbushësve të veturave elektrike në rrjetin e saj kombëtar të 232 shitësve deri në fund të këtij viti – mes lansimit të tre modeleve të reja deri në vitin 2025.
Rrjeti i mbushësve të veturave elektrike të Toyota-s fillimisht do të jetë i limituar në përdorim vetëm për veturat Toyota, por që në vitet në vijim mund të jetë i hapur edhe për markat rivale.
Instalimi i mbushësve të veturave elektrike do të paguhet nga shitësit e licencuar të Toyota – me një kosto të kombinuar e cila vlerësohet të jetë deri në afro 13 milionë euro (20 milionë dollarë australian), raporton Drive, transmeton Telegrafi.
Do të mbetet në duart e shitësve se sa mbushës të veturave elektrike do t’i instalojnë ata në çdo lokacion, dhe se nëse ato pajisje do të vendosen në brendësi apo do të jenë në dispozicion për 24 orë.
Në një prononcim për mediat sot, shefi i shitjeve dhe marketingut në Toyota Australia, Sean Hanley deklaroi: “Vetëm që të jemi të qartë, Toyota është e përkushtuar që t’i sjellim veturat elektrike në Australi – do të jeni mijëra njësi në pak vite, dhe përfundimisht do të sjellim dhjetëra-mijëra njësi e më shumë”.
Ekzekutivi i Toyota bëri të ditur se përderisa u nevojiten 22 vite për ta bërë të zakonshme teknologjinë hibride, ai pret që veturat elektrike të jenë gjerësisht të popullarizuara nga 5 deri në 10 vite. /Telegrafi/