Një nënë e tre fëmijëve në Meksikë i kishte dërguar një mesazh të ëmës, ku i kishte shkruar se taksisti me të cilin po udhëtonte “po sillet çuditshëm dhe po i duket i dyshimtë”. E këta rreshta ia kishte dërguar pak minuta para se ta rrëmbente.
Ende nuk dihen të gjitha detajet e rrëmbimit të Karen Espindole, 27-vjeçe, zhdukja e të cilës është raportuar gjatë javës së kaluar si dhe lajmi që kishte bërë bujë kur ajo i është rikthyer familjes së saj, transmeton Telegrafi.
Në videon e publikuar më poshtë shihet se si policia e Mexico City e dërgon Karenin në shtëpi, vetëm 16 orë pasi ishte rrëmbyer.
Vëllai i saj Daniel Espindola ka falënderuar të gjithë në Facebook për përkrahjen që i kishin dhënë, duke shkruar se motra e tij tani është e sigurtë.
Në anën tjetër babai i saj MigelAnhel Espindola, ka deklaruar se bija e tij po kthehej në shtëpi pasi kishte pasur një intervistë pune, kur kishte vërejtur duke u sjellë në mënyrë të çuditshme.
Ajo i kishte dërguar menjëherë një mesazh të ëmës: “Nënë, ky burrë më duket shumë i dyshimtë”. Ndërkaq e ëma ia kishte kthyer menjëherë: “E dashur dil nga vetura dhe merr një taksi tjetër”.
Por pas atij momenti e bija e saj më nuk ia kishte kthyer mesazhet, edhe pse e ëma i kishte dërguar pesë tjetër duke i kërkuar që t’ia dërgojë lokacionin e saktë.
Familjarët e saj menjëherë kishin raportuar zhdukjen e saj në polici, që menjëherë u nisën për ta kërkuar. Atyre iu deshën 16 orë që ta gjejnë dhe ta kthejnë në shtëpi.
Megjithatë, policia ende nuk ka dhënë detaje të këtij rrëmbimi, kështu që nuk dihet se ku ishte mbajtur Karen dhe gjithashtu nuk dihet se çfarë ka ndodhur me rrëmbyesin. /Telegrafi/