Roma ka arritur ta ndal Napolin në barazim 0-0, në një ndeshje fantastike në Olimpico.
Për Romën ishte një pikë e fituar pas dy humbjeve radhazi, një në kampionat dhe një tjetër në Ligën e Konferencës, derisa për Napolin ishte barazimi i parë në Serie A pas tetë fitoreve radhazi.
Jose Mourinho ka folur për barazimin ndaj Napolit, duke e cilësuar si një ndeshje të madhe.
“Për mua ishte një ndeshje e madhe, një ndeshje nivelit të lartë. Kam parë përqendrim të madh, jo frikë, por respekt për kundërshtarin. Mendoj se mbrojtësit e krahut po përmirësohen, kurse Veretout dhe Cristiane mbulojnë më mirë diagonal”.
“Ishte shumë e rëndësishme të shikonim Zaniolo dhe Mkhitaryan të ndihmojnë gjatë gjithë lojës. Ishte ndeshje intensive, pashë lojtarë të lodhur, patëm shanset tona dhe ishte një ndeshje unike edhe për dy kartonët e kuq që iu dhanë trajnerëve”.
“Nuk isha i lumtur për vendimin e gjyqtarit, por nuk thashë asnjë fjalë. Askush nuk po shkon në shtëpi lumtur, as unë, as Spalletti. Të dy u ndëshkuam me kartonë të kuq, por mendoj se arbitri ishte i ekuilibruar”, tha Mourinho.
Humbja nga Bodo/Glimt 6-1 nuk është harruar nga Jose Mourinho, që i është hakmarrë futbollistëve që ishin në fushë në Norvegji.
Marash Kumbulla, Borja Mayoral, Gonzalo Villar, Amadou Diawara dhe Bryan Reynolds përfunduan në tribunë në ndeshjen ndaj Napolit.
Mourinho ka dhënë arsyen pse i la ata në tribunë dhe nuk i grumbulloi për ndeshje, teksa tha se nuk i fal lehtë pasi është një humbje që do të mbetet në historinë e tij.
“Kur bën gjëra të këqija siç bëmë ne, ndeshja pasardhëse është gjithmonë e vështirë në aspektin emocional. Këto janë mesazhe për dhomat e zhveshjes. Ajo ndeshje do të mbetet në historinë time dhe për mua është e vështirë të fal”, deklaroi Mourinho. /Telegrafi/