Pas kërkesës së PSD-së për dorëheqjen e ministres Arbërie Nagavci, edhe ministri Xhelal Sveçla është vendosur në targetin e partive opozitare.
Deputetja e PDK-së në Kuvendin e Kosovës, Ganimete Musliu, pas arrestimit të një numri të madh të policëve kohëve të fundit, ka kërkuar dorëheqjen e drejtorit të Përgjithshëm të Policisë, Samedin Mehmeti dhe ministrit të Punëve të Brendshme, Xhelal Sveçla.
Musliu në Facebook ka shkruar se nuk ka më kuptim që edhe me tutje këta zyrtarë të ushtrojnë detyrën e tyre.
“Pas arrestimit të numrit të madh të policëve, nuk ka më kuptim që edhe me tutje të ushtrojnë detyrën e tyre, Drejtori i Përgjithshëm i Policisë së Kosovës Samedin Mehmeti dhe Ministri i Punëve të Brëndshme Xhelal Sveçla”, ka shkruar Musliu.
“Dorëheqja e tyre do t’i bënte nderë Policisë së Kosovës, Kosovës dhe vet Mehmetit e Sveçles”, shtoi ajo.
Kujtojmë, nën presion është vënë edhe ministrja Arbërie Nagavci pas vendimit të Gjykatës Kushtetuese për të anuluar vendimin e Ministrisë së Arsimit për organizimin e mësimit alternativ të përshpejtuar dhe përcaktimit të organizimit të mësimit në objektet shkollore në Komunën e Kamenicës./Telegrafi/
