Deputeti i Partisë Demokratike (PD) Oerd Bylykbashi, ka kujtuar momentet e fundit të takimit me deputetin e ndjerë Sokol Olldashi. Dje u bënë 4 vite nga ndarja nga jeta e Olldashit, ndërsa Bylykbashi përmes një statusi në rrjetin social ‘Facebook’ ka kujtuar takimin e fundit me të dhe momentin kur mori vesh për aksidentin.
Statusi i Oerd Bylykbashit
U ndamë rreth orës 13:00 pas mbledhjes se Komisionit të Ligjeve. I thamë njeri tjetrit mirupafshim. Me siguri do të shiheshim të nesërmen serish. Në ora 22:00 dola nga regjistrimi i një debati në një studio TV. Shiu binte litarë rrugës dhe ndërsa ngisja makinën, me vete thoja: ku e gjeti! Sapo parkova, mora një telefonatë. Nuk e besova. Mora një shok që më tha duke iu dridhur zëri “është prerë keq”. Shpresova që të ishte veç plagë. Mora një shok tjetër që ishte në vendngjarje. “Mbaroi!” me tha me zë të fikur. Nuk më benë këmbët të ngjitesha në shtëpi. Njoftova një shok të vjetër që u trondit po aq. Desha ta ndaja gjëmën, nuk e mbaja dot vetëm. Mu kujtua kur u ndamë në drekë me një mirupafshim, mu kujtua kafja e fundit tek Hotel Kotoni. Mu kujtua kur u ngjit në shkallet e drunjta mbi kokat e nxënësve që protestonin dhe të gjithë heshtëm ta dëgjonim ne atë mëngjes shkurti 1991 në palestrën e gjimnazit “Naim Frasheri” dhe nuk e pranoja që ai nuk do të vinte më…ishte shoku i parë i vjetër që nuk do të shihja më kurrë! Ishte si sot, si në këtë ore, 4 vite më parë. /Telegrafi/