Anëtarët e komisionit për Integrimin Evropian në Kuvendin e Shqipërisë zhvilluan një vizitë në Maqedoninë e Veriut për të marrë pjesë në takimin e parë mes komisioneve të çështjeve të Integrimit Evropian.
Në cilësinë e kryetares së Komisionit, deputetja e Partisë Demokratike, Jorida Tabaku zhvilloi takim me kryetarin e komunës Tetovë dhe njëkohësisht kryetarin e Lëvizjes Besa, Bilal Kasami, për të vijuar me turin e takimeve në Shkup.
Në qendër të axhendës ishin takimet me faktorin politik shqiptar ku në fokus ishte procesi i integrimit evropian dhe lidhja mes shteteve ku jetojnë shqiptarët.
Gjatë takimit të mbajtur në parlamentin e Maqedonisë së Veriut, Tabaku u shpreh në lidhje me rëndësinë e procesit të të integrimit, ndërsa theksoi faktin se procesi i integrimit është realisht transformues kur qytetarët përfitojnë prej tij.
Delegacioni zhvilloi takime edhe me kryetarin e Kuvendit, Talat Xhaferri dhe zv/kryeministrin Artan Grubi, me të cilin u diskutua lidhjet infrastrukturore mes Shqipërisë dhe Maqedonisë së Veriut.
Tabaku theksoi se në fushën e investimeve të huaja Maqedonia e Veriut është më përpara Shqipërisë duke përthithur më shumë investime.
Me kryetarin e BDI-së, Ali Ahmetin, takimi u fokusua në ndryshimet e kërkuara kushtetuese të Maqedonisë së Veriut dhe interesin e rajonit në procesin e integrimit. Të dyja palët ranë dakord se integrimi rajonit është jetik dhe i domosdoshëm duke parë rrezikun rus që është krijuar në rajon që pas agresionit rus të Ukrainës.
Tabaku u takua edhe me deputetët e VRMNO me të cilët diskutoi çështjet mbi ndryshimet kushtetuese dhe proceset e integrimit. /Telegrafi/
