Deputetët e Lëvizjes Vetëvendosje, Dimal Basha dhe Mefail Bajqinovci, kanë reaguar lidhur me qëndrimet e partive opozitare karshi zhvillimeve të fundit në veri të Kosovës.
Për largimin e përfaqësuesve serbë nga institucionet e Kosovës nga opozita e kanë fajësuar kryeministrin Albin Kurti, i cili ka refuzuar ta shtyjë zbatimin e reciprocitetit për targa të lëshuara nga Serbia për 10 muaj, siç kanë kërkuar aleatët ndërkombëtarë.
E deklarimet e tilla janë të dëmshme sipas deputetit të VV-së, Dimal Basha, i cili ka thënë se serbët po i bojkotojnë institucionet sepse kanë marrë urdhër nga presidenti serb, Aleksandar Vuçiqi, e jo nga Amerika.
“E dyta, refuzimi i Kryeministrit nuk është për Amerikën, por për Vuçiqin, i cili vazhdimisht i lufton institucionet e Republikës dhe serbët që dojnë t’i respektojnë institucionet tona”, ka shkruar Basha në Facebook.
Tutje, deputeti ka thënë se opozita duhet ta kuptojë që kundërshtimi i vendimit të Qeverisë është refuzim i implementimit të marrëveshjes që vetë e kanë nënshkruar, e që Serbia nuk e ka respektuar nga viti 2016.
“Tani po kërkoni me vazhdu që mos m’u respektu?! E fundit, dhe shumë e rëndësishme, fajin për çfarëdo destabilizimi në veri duhet faturuar Serbisë, jo Qeverisë sonë, sepse ne kemi policinë që po synon rend e ligj, kurse Serbia struktura paralele. Tani a ju duhet shpjegim shtesë se kush është destabilizuesi këtu?”.
“Ju përveç që nuk po ndihmoni, edhe po na dëmtoni, sepse kur po i thoni Albinit zmbrapsu, në fakt po i thoni Vuçiqit grahi!”, ka përfunduar ai.
Ndërsa, deputeti tjetër, Mefail Bajqinovci, është shprehur se opozita tani sikur kur ka qenë në veri është “e gatshme me u zmbraps edhe në situata kur Kosova ka të drejtë”.
“Albin Kurti dhe Vetëvendosja po dëshmojnë që përveç në qeverisje dallojnë shumë me klasën politike edhe në opozitëbërje. E opozita sot si në qeveri dje: e gatshme me u zmbraps edhe në situata kur Kosova ka të drejtë”, ka shkruar ai në Facebook. /Telegrafi/
