Prej disa muajsh ka stagnuar realizimi i projektit infrastrukturor të deponisë Rusino në Gostivar. Komuna e Gostivarit e cila në mënyrë direke është e tanguar nga problemi i mbeturinave, për vonesat fajëson administratën e Qeverisë dhe atë të rajonit planor të Pollogut, e cila, sipas kreut të kësaj komune Arben Taravari, vonon dokumentet e nevojshme për realizimin e projektit.
“Janë procedura më së shumti që vonohen mes Qeverisë dhe pushtetit lokal, gjegjësisht të administratës së Rajonit të Pollogut. Këtu nuk është vetëm faji i administratës së Pollogut por edhe ndërkombëtarëve, të cilët disi u vonuan në përpilimin dhe përgatitjen e funksionimit të ndërmarrjes rajonale. Kur them ndërkombëtarëve them ata që e financojnë këtë projekt pra financues është Agjencia për zhvillim e Zvicrës që jep një sasi të konsiderueshme të parave”, deklaroi Arben Taravari.kryetar i komunës së Gostivarit.
Nga ministria e ekologjisë e cila ka ingerencat mbi deponinë Rusino, thonë se s’ka vonesa të aktiviteteve.
“Procesi i vlerësimit të planit ka përfunduar në dhjetor të vitit 2019. Raporti për procesin e vlerësimit të planit është dorëzuar në Ministri për miratim në 29 janar të këtij viti dhe po punohet në këtë dokument. Nuk ka vonesa të aktiviteteve”, deklarojnë nga Ministria e Ekologjisë.
Të pyetur për problemin në fjalë, nga komuna e Tetovës kanë refuzuar të prononcohen para kamerave, ndërsa me shkrim janë përgjigjur se kanë ndarë nga buxheti mjetet për asfaltimin e pjesës së dytë të rrugës.
“Komuna e Tetovës si kofinancuesi i dytë më i madh i këtij projekti, javë më parë ka miratuar ndarjen e mjeteve prej 2.5 milion denarëve për financimin e vazhdimit të asfaltimit të rrugës dhe mburojave të hekurit”. Janë shprehur nga kjo komunë”, theksojnë nga Komuna e Tetovës.
Vonesa e realizimit të punëve në Rusino të Gostivarit, dëmton më tepër komunat e vogla, të cilat detyrohet që mbetjet ti bartin në Drislla të Shkupit.
“Është një vonesë që neve na krijon shumë probleme në terren. Kur vjen faza e dërgimit në Rusino, atje hasim në pengesa që faktikisht na shkakton edhe probleme në funksionim, pastaj edhe keqkuptime tek qytetarët sepse nuk mund ti hedhim në kohën e caktuar. Jemi të detyruar ti dërgojmë diku tjetër, si Drislla në Shkup e cila ka një kosto shumë të madhe- deklaroi Albon Xhemaili, kryetar i Komunës së Bogovinës
Sipas Regjonit planor të Pollogut që janë edhe realizues të projektit, tenderimi për pjesën e dytë të asfaltimit të rrugës, pritet që të hapet brenda dhjetë ditësh, ndërsa afati përfundimtar i realizimit të projektit është muaji qershor. Shfrytëzimi i deponisë rajonale Rusino nga nëntë komunat e Pollogut, ka filluar që para 15 vitesh. Që atëherë, është planifikuar modernizimi i kësaj deponie, me qëllim mbrojtjen e banorëve nga ndotja e tokës dhe ujit, por edhe pse premtime ka pasur gati çdo palë zgjedhje në programet e partive politike, ende deponia si e tillë vazhdon të ndotë ajrin tokën dhe ujin në fshatrat rreth deponisë./Alsat/
https://www.youtube.com/watch?v=EFWuLgvSj2Q&feature=emb_title