Në shenjë revolte ndaj publikimit të fotografive të një gruaje të masakruar në një gazetë, demonstrueset e kanë lyer derën e presidencës meksikane me ngjyrë të kuqe, duke simbolizuar gjakun e derdhur nga vrasja mizore.
Gjatë kohës kur presidenti i Meksikës, Andres Manuel Lopez Obrador po zhvillonte brenda konferencën e rregullt, demonstrueset thërrisnin kundër dhunës ndaj grave, që është shpeshtuar shumë kohëve të fundit, transmeton Telegrafi.
“Krim kundër grave” dhe “nuk do të na heshtni”, ishin mbishkrimet që u shkruan në mure, para se të fillojë një demonstratë e dhunshme, për të cilën u detyrua të intervenonte policia.
Situata ka eskaluar, pas publikimit të pamjeve në një gazetë, ku shihet Ingrid Escamilla e cila ishte vrarë, rrjepur dhe copëtuar.
Vrasja saj ka qenë e fundit, në mesin e shumë sulmeve të rënda ndaj grave të pambrojtura, ndaj të cilave konsiderohet se qeveria nuk është duke bërë asgjë. /Telegrafi/
